Testodi L. Bovio, musica di F. Buongiovanni.
Mia cara madre, sta pe' trasì Natale
E a stà luntano cchiù me sape amaro!
Comme vurria allummà dduje o ttre biancale!
Comme vurria sentì 'nu zampugnaro!
A 'e ninne mieje facitele 'o presepio
E a tavula mettite 'o piatto mio!
Facite, quann'è 'a sera d' 'a Vigilia,
Comme si 'mmiez'a vvuje stesse pur'io!
E nce ne costa lacreme 'st'America
A nuje, napulitane!
Pe' nuje ca ce chiagnimmo 'o cielo 'e Napule,
Comm'è amaro 'stu ppane!
Mia cara madre, che sò, che sò 'e denare?
Pe' chi se chiagne 'a Patria, nun sò niente!
Mò tengo quacche dollaro e me pare
Ca nun sò stato maje tanto pezzente.
Mme sonno tutt' 'e nnotte 'a casa mia
E d' 'e ccriature meje ne sento 'a voce,
Ma a vuje ve sonno comm'a 'na Maria
Cu 'e spade 'mpietto, 'nnanz' ô figlio 'ncroce.
E nce ne costa lacreme 'st'America...
M'avite scritto c'Assuntulella chiamma
Chi ll'ha lassata e sta luntana ancora.
Che v'aggi' 'a dì? Si 'e figlie vonno 'a mamma,
Facitela turnà chella "signora"!
Io no, nun torno, mme ne resto fore
E resto a faticà pe' tuttuquante.
I', c'aggio perzo patria, casa e onore,
I' sò carne 'e maciello, sò emigrante!
E nce ne costa lacreme 'st'America...
