Versi di A. M. Lamberti
La Biondina in gondoleta
L'altra sera gh'ho menà:
Dal piaser la povareta,
La s'ha in bota indormenzà.
La dormiva su sto brazzo,
Mi ogni tanto la svegiava,
Mi ogni tanto la svegiava,
Ma la barca che ninava
La tornava a indormenzar,
La tornava a indormenzar.
Contemplando fisso fisso
Le fatezze del mio ben,
Quel viseto cussi slisso,
Quela boca e quel bel sen;
Me sentiva drento in petto
Una smania, un missiamento,
Una smania, un missiamento,
Una spezie de contento
Che no so come spiegar,
Che no so come spiegar.
M'ho stufà po' finalmente,
De 'sto tanto so' dormir,
E gh'ho fato da insolente,
No m'ho avuto da pentir;
Perchè, oh Dio, che bele cosse
Che gh'ho dito, e che gh'ho fato,
Che gh'ho dito, e che gh'ho fato.
No, mai più tanto beato
Ai mii zorni no son sta,
Ai mii zorni no son sta.
