Testo di S. Di Giacomo
Nu juorno me ne jette da la casa,
Jenno vennenno spingole frangese;
Me chiamma na figliola: “Trase, trase!
Quanta spingole daje pe’ nu turnese?”
E io che songo nu poco viziuso,
Subbeto me ’mmuccaje dint’a sta casa.
Ah! Chi vo’ belle spingole frangese!
Ah! Chi vo’ belle spingole, ah, chi vo’!...
Dico io: “Si tu mme daje tre o quatte vase,
Te donco tutte ’e spingole frangese,
Pizzeche e vase nun fanno pertose,
E puo’ jenghere ‘e spingole ‘o paese!
Sentite a me, ca pure ’mparaviso
’E vase vanno a cinco nu turnese.
Ah! Chi vo’ belle spingole frangese!
Ah! Chi vo’ belle spingole, ah, chi vo’!...
Dicette: “Bello mio, chisto è ’o paese
Ca si te prore ’o naso muore acciso”.
E io rispunnette: “Aggi pacienza, scusa,
’A tengo ’a ’nnammurata e sta ’o paese!
E tene ’a faccia comme ’e ffronne ’e rose,
E tene ’a vocca comme a na cerasa!
Ah! Chi vo’ belle spingole frangese!
Ah! Chi vo’ belle spingole, ah, chi vo’!...
"'E spingole frangese" è una canzone in lingua napoletana ripresa da Salvatore Di Giacomo ed Enrico De Leva da un canto popolare del comune di Pomigliano d'Arco. La canzone infatti era già presente in uno dei volumi di "Canti popolari delle provincie meridionali", pubblicato nel 1872 da Antonio Casetti.
