Versi di S. Di Giacomo, musica di F. P. Tosti.
Quanno sponta la luna a Marechiare
Pure li pisce ’nce fann’a l’ammore,
Se revotano l’onne de lu mare,
Pe’ la priezza cagneno culore.
Quanno sponta la luna a Marechiare.
A Marechiare ’nce sta na fenesta,
La passione mia ’nce tuzzulea,
Nu carofano addora int’a ’na testa,
Passa l’acqua pe’ sotto, e murmulea:
A Marechiare ’nce sta na fenesta.
Ah! Ah! A Marechiare, a Marechiare,
nce sta na fenesta.
Chi dice ca li stelle so’ lucente
Nun sape st’uocchje ca tu tiene ’nfronte,
’Sti ddoje stelle li saccio io sulamente,
Dint’a lu core ne tengo li ponte.
Chi dice ca li stelle so’ lucente.
Scetate, Carulì, ca l’aria è doce,
Quanno maje tanto tiempo aggio aspettato?
P’accumpagna’ li suone co’ la voce
Stasera na chitarra aggio portato.
Scetate, Carulì, ca l’aria è doce!
Ah! Ah! O scetate, o scetate,
scetate, Carulì, ca l’area è doce.
